O Concello de Culleredo e a Xunta de Galicia acaban de asinar o convenio de colaboración para o mantemento do centro de acollida para a atención de mulleres vítimas de violencia de xénero, do que é titular o Concello. Co acordo, o Concello recibe a axuda autonómica para o funcionamento deste recurso social, en marcha desde 1991.
O convenio, asinado polo alcalde, Julio Sacristán, e a secretaria xeral de Igualdade, Susana López Abella, supón o financiamento de 46.000 euros para o centro. O Concello poderá destinalos tanto a gasto corrente como a labores de asistencia psicolóxica e xurídica.
Con este servizo, o Concello de Culleredo atende e trata tanto ás mulleres vítimas da violencia de xénero como aos seus fillos. Cando é posible tamén recibe a mulleres do resto da provincia e de Galicia.
O Concello, ademais desta axuda autonómica, conta anualmente con outro convenio coa Deputación da Coruña para facer posible este servizo integral de apoio, acollida e recuperación.