ES / GL

Nova formación en emerxencias sanitarias para os maiores

20 Maio, 2016. 18:30

Benestar Social

O Concello de Culleredo leva tamén a preparación ante emerxencias sanitarias aos maiores do municipio. O proxecto "As túas mans salvan vidas", da Concellaría de Benestar Social, non se cingue este ano aos escolares e chega aos participantes na actividade de ximnasia para maiores.

Esta formación especializada consiste en charlas que se dan nas 9 parroquias do concello nas que funcionan grupos de ximnasia +65 con decenas de veciños. Trata, entre outras pautas a seguir ante unha emerxencia, nocións básicas de primeiros auxilios, a aprendizaxe do procedemento de resucitación cardiopulmonar, ou a manobra de Heimlich para casos de atragantamentos.

A finalidade é a formación da poboación cullerdense en habilidades básicas preventivas en materia de saúde. "Debemos concienciarnos da importancia de ter coñecementos suficientes para actuar en caso dunha emerxencia de saúde", apunta Lupe Pombo, concelleira de Benestar Social.

Os profesionais da Asociación Galega de Técnicos en Emerxencias Sanitarias, ASGATE, son os encargados de impartir estas charlas no marco do convenio de colaboración que teñen co Concello. Nas charlas utilízase unha metodoloxía eminentemente práctica e participativa, empregando bonecos de dimensións humanas para traballar, coas persoas asistentes, as distintas técnicas.