O Concello de Culleredo puxo en marcha desde o mes de xullo o programa Verán Movidiño, que ten como obxectivo promocionar o deporte e os hábitos saudables entre toda a cidadanía. Non importa a idade, é gratuíto e tampouco fai falta apuntarse, simplemente desprazarse polos cinco puntos nos que se realiza a actividade a diario por parte dun monitor especializado.

A iniciativa pretende incentivar aos veciños de todas as idades a levar un verán activo e saudable. Esta época é ideal para iniciar a práctica de exercicio e adquirir así un bo hábito necesario e saudable.

Cada día e ata o mes de outubro un monitor desprázase a unha das cinco zonas habilitadas no Concello para traballar coas persoas que alí se dean cita. Ata o momento xa pasaron centos de veciños polo programa e varios repiten a experiencia cada semana.

A programación semanal é a seguinte:
Os luns a cita é en Sueiro, de 19.30 horas a 20.30 horas; os martes en Tarrío, de 20 a 21 horas; os mércores en Celas de Peiro, de 19.30 a 20.30 horas, os xoves  en Fonteculler, de 10 a 11 horas; e os venres no Paseo Marítimo do Burgo, de 10 a 11 horas.

A actividade leva a cabo diferentes modalidades de exercicios: ximnasia, paseos, sendeirismo, xogos, e mesmo o uso de aparellos dos parques biosaludables. A música non falta para animar aos participantes a seguir o ritmo dos monitores e, de paso, chamar a atención dous paseantes. Calquera  que pase pola zona pode animarse a participar na actividade.

Para obter máis información pódese contactar cos centros municipais de servizos sociais no teléfono 981 65 45 70.