A reparación da rede de semáforos era unha das prioridades do Concello de Culleredo tras recibir a cesión da AC-211 por parte da Xunta de Galicia. A día de hoxe, a rede xa foi reparada e atópase en estado óptimo para regular a circulación na vía pública.

O Concello acaba de completar o arranxo dos semáforos en Fonteculler, Acea de Ama, O Burgo e tamén en Vilaboa, na intersección de Alcalde Domingo Sierra coa N550, encima da autoestrada.

Os traballos incluíron en primeiro lugar a substitución das ópticas LED que estaban fundidas. En total foron 40 as cambiadas, principalmente situadas no verde dos vehículos. E tamén nos repetidores (as luces baixas).

Outro dos elementos nos que se actuou foron os pulsadores. Localizáronse varios deles rotos. Mesmo algúns presentaban auga no seu interior, o que provocaba un mal funcionamento, acendendo o semáforo aínda que non cruzase ninguén, o que retardaba a circulación.

Así mesmo, reparouse o semáforo da avenida de Fonteculler, situado xunto ao colexio Ponte Pasaxe, que tiña roto o soporte.

Ademais, no mencionado cruzamento de Vilaboa reorientáronse os semáforos, movidos polo golpeo de camións.

Agora o plan do Concello para por efectuar unha análise dos fluxos de tráfico para adoptar posibles cambios na frecuencia dos semáforos. O actual cadro, que era o marcado pola Xunta ao ser a estrada da súa propiedade, provén de 2010. O goberno local, mediante aforadores, poderá establecer cambios segundo o que ditamine a Policía Local para contribuír á fluidez do tráfico e a seguridade viaria dos peóns.

O primeiro tenente de alcalde, José Ramón Rioboo, explica que a mellora da rede de semáforos era moi desexada polo goberno local e os veciños e agora ao recibir a AC-211 púidose acelerar desde o Concello ao ser competencia municipal. Rioboo sinala que ao ter agora a xestión directa da vía promoverase un mantemento eficaz que evite que se estean moitos meses esperando por unha solución como ocorreu con estes semáforos.