ES / GL

O Concello licita obras no Bosque, Vinseira Grande e na pista deportiva de Castelo

20 Decembro, 2016. 18:54

Alcaldía

O Concello de Culleredo continua mellorando os servizos públicos básicos cunha serie de actuacións que considera prioritarias e que foron demandadas polos veciños.

Neste caso licita a renovación da rede de abastecemento do Bosque e a instalación da rede de saneamento en Vinseira Grande e no polideportivo municipal de Castelo. As obras contan cun orzamento de 40.000 euros.

A renovación da rede de abastecemento do Bosque levarase a cabo coa instalación dunha nova canalización de case 250 metros con tres acometidas básicas para que os veciños desta zona accedan ao servizo de auga potable.

En canto á rede de saneamento en Vinseira Grande procederase á instalación dunha tubaxe de 200 metros de longo con seis pozos de rexistro de formigón que facilitarán o enganche de varios veciños que até o momento non dispuñan de servizo público de saneamento.

Así mesmo, no caso do Polideportivo de Castelo a obra será similar á anterior cunha nova canalización de cen metros de lonxitude e con tres pozos de rexistro, que darán solución a unha vella demanda da parroquia.

O executivo local está a levar a cabo actuacións similares en varias parroquias para garantir tanto o servizo de abastecemento como de saneamento seguindo as demandas dos veciños e priorizando as máis urxentes.