ES / GL

Os alumnos de APEM estrean na Casa Rosa o seu belén feito con fofuchas

20 Decembro, 2016. 19:03

Benestar Social

O Burgo conta desde hoxe co seu belén máis social. Os alumnos do Centro de Rehabilitación Laboral e Psicosocial que APEM (Asociación Pro Enfermos Mentais) ten na Casa Rosa estrearon hoxe o seu belén realizado con bonecas fofuchas.

É o traballo de dous anos destes alumnos, nunha técnica de manualidades con goma eva que se adapta moi ben ás súas necesidades. O resultado é espectacular, con moitos personaxes e detalles moi coidados na paisaxe ou no atrezo.

Con moita emoción inauguraron hoxe o belén. Ao acto acudiu a concelleira de Benestar Social, Lupe Pombo, a de Educación, Carmen Varela, e a presidenta de APEM, María Antonia Pérez, así como persoal da asociación, técnicos municipais, e membros doutras entidades sociais que traballan en Culleredo.

Pombo deu o parabén aos alumnos polo incrible resultado do seu traballo. "Estamos moi orgullosos de que esteades a aproveitar esta Casa Rosa para a vosa formación", afirmou.

Os alumnos tamén mostraron os seus dotes ao canto para pór son ao acto. Interpretaron varias panxoliñas de Nadal, ao ritmo de acordeón. Logo actuou o coro de Voces Veteranas do Concello, tamén con panxoliñas aos que mesmo se sumaron os usuarios da Casa Rosa, como foi o clásico "Dime niño de quién eres".

Agora o belén permanecerá exposto na planta baixa da Casa Rosa para que poida ser visitado polos veciños. A presidenta de APEM mostrouse encantada con abrir as portas do centro para que a sociedade coñeza ademais o que alí traballan.

O centro de rehabilitación, aberto en abril tras a cesión por parte do Concello a APEM e as obras que esta acometeu, dá servizo a 40 usuarios con esta doenza no labor da entidade de promocionar a súa vida autónoma. Por iso, aprenden tarefas domésticas, como a cociña, a coser ou a pasar o ferro.