ES / GL

Máxima tranquilidade ante a petición de expedientes do Xulgado por unha denuncia con clara motivación política

20 Febreiro, 2017. 21:20

Alcaldía

Na mañá de hoxe, luns 20 de febreiro de 2017, axentes da Policía Xudicial personáronse no Concello de Culleredo para requirir mediante oficio unha serie de documentación a diferentes departamentos municipais. Ante estes feitos, o Concello manifesta o seguinte:

1. O requirimento do xulgado nº4, é consecuencia dunha denuncia dun funcionario municipal, policía local, vinculado a un partido político de forma pública. O oficio forma parte do procedemento normal de instrución. O Goberno Local ten meridianamente claro que responde a unha motivación política.

2. O Concello, como é normal, proporcionou toda a documentación dos expedientes requiridos polo Xulgado e que estaban a trámite algún deles polos servizos técnicos municipais. Corresponde a 17 expedientes de disciplina urbanística, dúas de terrazas, un de apertura de negocio, e un dunha autorización de vao.

Así mesmo, tamén se proporcionaron diversos boletíns de denuncias da Policía Local, correspondentes ao ano 2010.

3. O Concello de Culleredo manifesta a súa máxima tranquilidade ante este procedemento. Continuará en todo momento colaborando co Xulgado en todo o que faga falta para aclarar calquera cuestión que se considere oportuna.

4. Non é a primeira vez que o goberno de Culleredo vive este tipo de denuncias políticas. O goberno local asegura que non vai conseguir paralizar a vida municipal. No mesmo día de hoxe, a pesar de que se tratou dun proceso longo porque o persoal municipal tivo que realizar copias dos expedientes entregados, o Concello seguiu funcionando con normalidade.

5. O alcalde mostra a súa absoluta tranquilidade ante esta denuncia e seguiu traballando con absoluta normalidade, atendendo os asuntos e as entrevistas con cidadáns que tiña previstas.