ES / GL

Un plan municipal de 260.000 ampliará a rede de saneamento en diversos núcleos

11 Maio, 2017. 18:16

Medioambiente e Servizos

O Concello de Culleredo emprenderá un novo plan para ampliar o servizo de saneamento de augas residuais en diversos núcleos. Será un investimento de 260.000 euros, procedentes das arcas municipais, para responder a peticións trasladadas polos veciños.

Un primeiro paso será unha pequena actuación para instalar a rede no núcleo dos Condes, pertencente á parroquia de Sésamo. O Concello iniciou o procedemento de contratación da obra. Conta cun orzamento de 27.366,98 euros.

A intervención consistirá na instalación dun colector de 164 metros de lonxitude que permitirá dar servizo aos inmobles da contorna. Os traballos obrigarán a acometer un cruzamento na AC-400 e incluirán a instalación dun pozo de rexistro de formigón prefabricado.

Posteriormente, o plan contempla actuacións en Cillobre, Vinseira, Boedo, Conduzo, Outeiro, Souto e Os Confurcos.

O primeiro tenente de alcalde e responsable de Obras, José Ramón Rioboo, sinala que o proxecto responderá as peticións transmitidas polos veciños. Explica que o incremento da rede de saneamento é "unha constante" nos plans municipais de cada ano polos beneficios para o medio e as mellores prestacións que supón o servizo para os residentes.