ES / GL

O Olímpico de Rutis, vencedor do XL Trofeo de Fútbol Afeccionado do Concello

28 Agosto, 2017. 15:57

Deportes

Tras unha competida final o Olímpico, que adestra Miguel Corral, fíxose co triunfo no XL Trofeo de Fútbol Concello de Culleredo Afeccionados ao gañar no partido decisivo ao Portazgo por 2-0. O campo do Rutis acolleu o pasado sábado este partido que decidía unha competición na que participaron tamén a UDJ Almeiras, a AD Culleredo e o equipo B do Olímpico.

A competición desenvolveuse desde o 11 de agosto con cruces repartidos en dous grupos. O Olímpico A e o Portazgo foron os mellores nos seus respectivos grupos accedendo así á final.

O alcalde en funcións, José Ramón Rioboo, e o concelleiro de Deportes, Miguel Suárez, foron os encargados de facer entrega dos trofeos aos diferentes equipos participantes nesta competición cullerdense.

Os Veteranos xogan a final o venres

A categoría Veteranos alcanza este ano a súa vixésima edición co concurso de Portazgo SD, Almeiras, Sporting Burgo, Olímpico e Fontemaior que xa se gañou o seu sitio na final ao erixirse campión do grupo A. O partido decisivo xogarase o venres 1 de setembro ás 21:00 horas no Campo do Burgo. O rival do Fontemaior sairá do encontro que teñen pendente de disputar as escuadras do Olímpico e o Portazgo.

O Sporting Burgo, campión infantil

En categoría Infantil a competición centralizouse na mañá do sábado a modo de triangular con partidos a media parte. O maior número de goles a favor fixo gañador ao Sporting Burgo que empatou a vitorias co Olímpico, subcampión. O terceiro posto ocupouno o Portazgo SD.