ES / GL

Culleredo proxecta a modernización das pistas deportivas do paseo marítimo

26 Marzo, 2018. 15:57

Entre os distintos espazos de lecer que alberga o paseo marítimo entre Fonteculler e O Burgo atópanse dúas pistas deportivas, que reúnen cada día a moitos veciños, especialmente nenos. O Concello de Culleredo prepara un proxecto para modernizar as instalacións, incrementando a súa funcionalidade e as súas prestacións.

As pistas sitúanse na zona da Cros, de carácter eminentemente residencial. O seu uso elevado, para a práctica de fútbol sala, baloncesto, balonmán ou simplemente para que xoguen os nenos, demanda un mantemento continuado. Baixo este prisma, o Concello dotará aos espazos dun novo firme, pensado especificamente para a práctica deportiva.

É un sistema de revestimento deportivo sobre soportes de formigón, especialmente deseñado para o deporte a nivel amateur de alta calidade. É un método continuo, fácil de reparar e manter, cunha textura microrrugosa impermeable idónea para o xogo.

A marcaxe das liñas deportivas levase a cabo cunha pintura acrílica mate. As pistas poderán albergar dúas canchas de baloncesto e unha de fútbol sala e balonmán. Tamén se revisarán os elementos de material deportivo e os peches das instalacións.

Ademais das prestacións, as pistas cambiarán completamente de imaxe. A idea do goberno local é que todas as instalacións desta clase teñan unha estética unificada. Así, o firme será azul, terán marcado o escudo do Concello, e cartel identificativo.