ES / GL

Culleredo modifica un tramo da avenida de Vilaboa para incrementar a seguridade viaria e o aparcadoiro

16 Abril, 2018. 16:52

Unha pequena reorganización nun tramo da antiga Nacional 550 en Vilaboa permite o incremento da seguridade viaria e das prazas de aparcadoiro. O Concello de Culleredo segue espremendo as posibilidades de mellora da avenida desde que asumiu o seu mantemento.

Nesta ocasión, a actuación consiste na modificación de 70 centímetros do eixo da vía entre as rúas O Souto e O Rueiro. Isto permite, mantendo o mesmo ancho dos carrís de circulación, gañar unha ducia de prazas de estacionamento en liña, na marxe dereita en dirección cara a Alvedro.

A nivel de seguridade viaria, o Concello xera un novo paso para peóns. A sinalización horizontal xa foi pintada e os sinais verticais están preparados para a súa colocación inminente.

Esta intervención foi proxectada na reunión mantida entre o alcalde, José Ramón Rioboo, a Policía Local de Culleredo e técnicos de obras, que analizaron as opcións de mellora das condicións da estrada tras a súa entrega ao Concello.