ES / GL

Este domingo os vehículos históricos rodarán por Culleredo

23 Maio, 2018. 12:45

Este domingo, 27 de maio, os veciños de Culleredo terán a sensación de viaxar atrás no tempo. Polas rúas do municipio rodarán os coches e as motos clásicas que participarán na quinta edición do Rally de Culleredo, de regularidade e vehículos históricos, organizado polo ‘Club clásico Os Brozos’ coa colaboración do Concello e Motoclub Culleredo.

Haberá modelos, uns 25 coches e 10 motos, de todo tipo. Todos eles teñen máis de 25 anos de idade e poderán contemplarse na explanada do Paseo Marítimo do Burgo a partir das 9.00 horas, antes do comezo da proba.

Ás 11.00 horas comezará a proba para os inscritos. Será un paseo (o límite máximo de velocidade é de 49 km/ h) polo Xalo, Carral, Meirama, Boedo, Loureda, Cambre e regreso ao Burgo ás 16.00 horas. Ao comezo do rally os participantes farán unha parada no cemiterio de Culleredo para depositar un ramo de flores en homenaxe a José Ramallo, ‘ Pequecho’.

Este ano todos os puntos do percorrido bautizáronse co nome de pilotos que tiveron gran relevancia en Culleredo e en toda a comarca, tendo así o tramo Pequecho, Carlos Piñeiro, Carlos Pan, Santiago Salido, Carlos Arrojo e Doutor José Larrea.