ES / GL

O Concello de Culleredo promove o exercicio físico durante todo o ano a través do seu 'Verán movidiño'

20 Xullo, 2018. 08:24

Outro ano máis o Concello de Culleredo organiza o seu 'Verán Movidiño', que comeza o luns 23 de xullo e termina o 30 de setembro e pretende promover o exercicio físico durante os meses de verán, tanto de maneira individual como grupal.

O obxectivo é que a xente continúe durante o inverno levando a cabo este tipo de prácticas pola súa conta ou inscribíndose na oferta deportiva e de actividade física do Concello ou doutras entidades do termo municipal.

As sesións, que se realizan un día a semana durante unha hora en 6 lugares do Concello (Sueiro, Tarrío, Celas, Fonteculler, O Burgo e Vilaboa) teñen un carácter de captación e de prevención, son de acceso libre, sen cota de inscrición e van dirixidas a todas as idades. Realízanse en espazos abertos, con música e en contacto coa natureza, utilizando os recursos que hai na contorna.

Compleméntanse estas sesións cun itinerario saudable, a finais de setembro, que se levará a cabo por unha zona do municipio onde poñer en práctica o aprendido, reforzando o sentimento de grupo.

No folleto aparecen os lugares, días e horas nos que se realiza esta actividade, que son os mesmos do ano pasado e nesta ocasión ademais haberá un grupo de nova creación a petición dos veciños: en Vilaboa no Pazo de Vila Melania os mércores de 18 a 19 horas.

Xa podedes consultar o programa definitivo de 'Verán Movidiño' no documento adxunto.