O alcalde do Concello de Culleredo, José Ramón Rioboo, propúxolles ás autoridades sanitarias estudar a realización dun cribado no municipio ante o constante crecemento da curva epidemiolóxica.

“Trasladamos esta posibilidade para que sexa analizada nos termos que sanitariamente se consideren para poder frear a expansión do virus”, subliña.

Da mesma maneira que o Concello apoiou a realización de cribados en municipios con datos que así o determinen, trasládase agora a posibilidade de que sexa en Culleredo, e dado o incremento diario do número de casos, que xa se sitúa en 306 activos a data de 29 de xaneiro.

Á súa vez, a Policía Local continúa a diario cos dispositivos de control das principais medidas de restrición determinadas por  Sanidade como fórmulas para frear os contagios. A implicación da cidadanía é fundamental nun momento como este, e faise un chamamento á responsabilidade de todas e todos para cumprir de maneira escrupulosa con estas medidas.