A Consellería de Sanidade vén de comunicarlle ao Concello os datos definitivos do cribado poboacional conxunto de Cambre e Culleredo. Para a nosa localidade, o 66,64% dos veciños acudiron á realización das probas, nas que se detectaron un total de 21 persoas positivas, unha taxa do 0,22%.

As probas comezaron o pasado 4 de febreiro e ata Acea de Ama desprazáronse máis de 14.000 veciñas e veciños de Culleredo. A incidencia da covid-19 segue en tendencia descendente, aínda que hoxe aínda se rexistra un número de positivos moi elevado, 188.

Desde o goberno local advirten da “suma importancia de seguir respectando as normas para que este esforzo que estamos a facer repercuta positivamente no futuro máis inmediato”, e manifestan o seu agradecemento tanto “á Consellería como aos sanitarios e sanitarias que traballaron no cribado; así como a Protección Civil, Emerxencias, voluntarias e voluntarios e Policía Local, cuxa coordinación foi clave para que todo funcionase á perfección”, destacan.