O Concello de Culleredo informa que hoxe, mércores  24 de marzo, comezou un novo cribado entre a cidadanía do municipio para detectar casos positivos por coronavirus.

Desenvólvese esta vez a través das farmacias adheridas á iniciativa e mediante PCR de mostras de saliva.

Vai dirixido á veciñanza de 30 a 64 anos de idade co centro de saúde localizado no municipio. En principio realizarase durante as vindeiras 3 semanas.

As persoas que desexen efectuar a PCR, de xeito gratuíto, poden acudir a algunha das farmacias a coller os botes onde depositar a saliva.

O funcionamento é o seguinte: a persoa participante, na súa casa, recolle 1 ml de saliva ao levantarse en xaxún sen tomar auga e sen lavarse os dentes. É importante que sexa saliva e non conteña mucosidade. Unha vez recollida a mostra, deberá entregar o tubo de saliva na oficina de farmacia que o recolleu. Sanidade notificará o resultado mediante SMS.

Quedan excluídas de participar as persoas que cumpran algunha das seguintes restricións:

• Teñen un resultado POSITIVO por covid-19 nos derradeiros 3 meses.
• Actualmente son contactos de seguimento covid-19.
• Teñen feito unha PCR nos últimos 15 días.
• Presentan síntomas compatibles coa infección.

Consulta na túa farmacia habitual se forma parte desta iniciativa.