O  Concello de Culleredo celebrará este ano unha nova edición do  Burgojazz, que terá lugar durante os días 2 e 3 de xullo no Xardín Botánico. Daranse cita os grupos  Mr.  Cool &  Ton Risco,  Dixie  Kings  Feat  Paty Lesta, O  Intre e Habana Soul. 

 

Mr.  Cool &  Ton Risco xúntanse despois de compartir escenario en múltiples ocasións, esta vez a dúo, cantando cancións que abarcan desde boleros a xéneros como o swing, a  bossanova ou o  calipso. 

 

O elegante repertorio de O Intre transportaranos, a través de músicas populares de Brasil, Francia e países de Latinoamérica, ao principio do século pasado. Desde os tangos e boleros chegando ata o  musette francés, engadindo temas de creación propia cun toque nostálxico. 

 

Havana Soul está formada por músicos  galegos e cubanos residentes en Galicia desde fai máis de vinte anos. Con este proxecto, queren render homenaxe a unha época e a unha maneira de entender e concibir o música pero cunha perspectiva do noso tempo. O espectáculo fusiona a música cubana co jazz, o soul e a música  galega. 

 

O sexteto  DixieKings nace coa finalidade de introducir o público no Jazz máis tradicional, o  Dixie que rememoran as bandas rueiras dos anos 10-20 cos seus inconfundibles desfiles. Entre o seu repertorio atópanse clásicos como Oh When The Saints go marchin in y Down By the Riverside entre outros. 

 

A reserva de asentos poderase facer efectiva a semana dos concertos no teléfono habilitado 981 665 597. As entradas serán completamente  gratuítas pero, seguindo as recomendacións sanitarias, a capacidade será limitada. 

 

Os concertos comezarán ás 20:30 horas tanto o venres como o sábado, e desde a área de Cultura avanzan que “a decisión foi recuperar un evento xa asentado no noso municipio, no que se dan cita grandes figuras do panorama do jazz. A organización contará con estritos protocolos de seguridade e hixiene e esperemos que a celebración do  Burgojazz sexa un primeiro paso para seguir dando un impulso á cultura tanto ao aire libre como en recintos pechados, sempre analizando o contexto vixente”, aseguran.