O Concello de Culleredo insiste na necesidade de que os propietarios das leiras privadas teñen o deber de realizar as limpezas correspondentes aínda a pesar de que non recibisen notificación da Administración local.

En 2020 abríronse 96 expedientes, dos que se resolveron 40 e en 2021 están a tramitarse 55. Dado ao estado de moitas delas, insístese na colaboración cidadá “por salubridade e imaxe” no municipio, e avánzase que o seguinte paso será “sancionar en quince días aos que non executasen a orde”, engaden desde o goberno local.

Os servizos técnicos municipais seguen tramitando as denuncias que realizan os particulares por rexistro. Nalgúns casos os prazos demóranse ao non aparecer os donos, sendo necesario publicar os avisos nos boletíns oficiais. Un dos casos máis complexos sucede cando é preciso localizar aos herdeiros.

O alcalde de Culleredo, José Ramón Rioboo, fai un chamamento á responsabilidade para atender os requirimentos “en tempo e forma” minimizando así ademais o risco de incendios.