O ANPA Rosalía de Castro, do CEIP de Tarrío, organiza unha nova campaña de recollida solidaria de alimentos para o Nadal 2021, despois da impulsada o ano pasado. Debido á boa acollida desta iniciativa, este ano tamén se sumarán as organizacións de pais e nais do Vila de Rutis e do Sofía  Casanova. O seu obxectivo é o de facer o reparto de todo tipo de víveres para que poidan gozar deles as familias do municipio que máis o precisen.

As ANPA’ s, en colaboración coa concellería de Educación e Cruz Vermella, apostan novamente por unha campaña que xa obtivo unha magnífica resposta veciñal na pasada edición. Repartiranse a través de Cruz Vermella, coa que traballa o Concello de Culleredo na resposta social de primeira necesidade.

As familias interesadas en participar poden depositar os produtos nos propios centros, en recipientes habilitados para tal fin e cedidos por parte de Cruz Vermella. O prazo está aberto desde mañá, martes 23 de novembro, ata o próximo 17 de decembro.

A concelleira de Educación,  Jéssica Méndez, quixo agradecer “a implicación de todos os axentes participantes nunha iniciativa que é unha onda de solidariedade, que pon de manifesto que o pobo de Culleredo está en primeira liña cando se trata de  contribuír, axudar e ser  empático”.