O Concello de Culleredo persiste na súa aposta pola formación impartindo dous certificados de profesionalidade na especialidade de “Atención sociosanitaria a persoas dependentes en institucións sociais", cunha duración de 478 horas cada un. As aulas deron comezo o pasado 24 de xaneiro no Centro Municipal de Formación e Emprego Pablo Picasso, onde participan 30 persoas, a maior parte en situación de desemprego.

Este certificado cualifica para atender ás persoas dependentes no ámbito sociosanitario da institución onde se desenvolva a actuación, aplicando as estratexias deseñadas polo equipo interdisciplinar competente e os procedementos para manter e mellorar a súa autonomía persoal e as súas relacións coa contorna.

Os módulos que compoñen este certificado son: apoio na organización de intervencións no ámbito institucional; intervención na atención hixiénico-alimentaria en institucións; intervención na atención sociosanitaria en institucións; apoio psicosocial, atención  relacional e comunicativa en institucións; módulo de prácticas profesionais non laborais e os módulos transversais.