O alcalde, José Ramón Rioboo, a tenente de alcalde, Lupe Pombo e a representante da Fundación Paz e González, María José Santos Veira reuníronse no Concello para tratar o futuro centro de maiores da parroquia, para cuxa construción se estudará a viabilidade da devandita instalación.

“O complexo deste proxecto non é a súa execución, se non o posterior mantemento, dado os altos custos que teñen en material e persoal”, admitiu Rioboo, quen se compromete a “realizar un estudo económico, financeiro e de viabilidade”. 

Santos Veira expuxo que se dispoñen duns 400.000 euros, dos que ela é unha das albaceas. Por ambas as partes amosouse unha total disposición para “deseñar conxuntamente e en conexión co departamento de Servizos Sociais un programa de actividades que dinamicen a convivencia entre as e os maiores de Almeiras”.

En todo caso, o goberno local quedou emprazado a falar con diferentes colectivos e administracións, e a través da asistencia técnica, facer que esta idea sexa viable a medio prazo. Habería que dar a coñecer este investimento a todas as persoas que conforman a dirección da Fundación Paz e González, para despois reunirse cos veciños e veciñas e que decidan en función dos custos que poida ter o centro. 

Tanto Rioboo como Pombo mostraron a “total disposición do Concello para estreitar en todo o posible as colaboracións administrativas e poder facer viable un proxecto que redundaría no beneficio da parroquia de Almeiras e nos seus maiores”.