O alcalde de Culleredo, José Ramón Rioboo, e o edil de Comercio, Mario Iglesias, fixeron entrega esta mañá dos tres premios que acreditan aos mellores escaparates no III Concurso de Escaparatismo de Nadal Concello de Culleredo, no que non só resultaron premiadas as mellores composicións, senón tamén os veciños e veciñas, cun sorteo final de 20 premios valorados en 50 euros cada un, que deberán ser gastados nalgún dos comercios adheridos á campaña.

Así, a Clínica Veterinaria Haciadama alzouse co primeiro posto tras sumar as valoracións populares e a do xurado profesional, cun 7,75 sobre 10. DecoKasa seguiulle, cunha nota total de 7,27 e en terceiro lugar, Centro de Día Mimos cun 7,22.

Premios

O primeiro premio será a montaxe de tres escaparates durante todo o ano 2023, por un profesional do sector do escaparatismo de recoñecido prestixio. O segundo premio consistirá na montaxe de dous escaparates e o terceiro premio, dun escaparate feito por un profesional do sector do escaparatismo de recoñecido prestixio. Cada decoración de escaparate está valorada en 330 euros e ten que permanecer exposta un mínimo de 30 días.