O Concello de Culleredo propón adicar un investimento de 160.000 euros á renovación da rúa Irmáns Suárez Ferrín, na Corveira. Trátase dunha vía residencial que comunica a avenida de Cordeda coa rotonda de Amparo López Jean, cun elevado tránsito.

O proxecto ten como principal obxectivo o incremento da seguridade viaria nesta rúa, de 390 metros de lonxitude. Actualmente presenta zonas deterioradas polo paso do tempo e detectouse a necesidade de mellorar a accesibilidade.

A intervención suporá, por unha banda, a renovación da pavimentación e das beirarrúas, que serán ampliadas xunto aos pasos de peóns. Desa forma lograrase unha maior visibilidade e protección dos viandantes.

En canto a accesibilidade, instalarase unha nova varanda na zona con máis pendente. A actuación inclúe tamén a dotación de iluminación con tecnoloxía LED, favorecendo a eficiencia e o incremento da luminosidade.

Tamén se renovará a sinalización horizontal e vertical e colocaranse novas papeleiras na zona.

O goberno local inclúe esta actuación no Plan de Obras que financia a Deputación da Coruña. Será elevado ao pleno extraordinario que se celebrará este venres. O orzamento é de 160.940,91 euros.