O Concello de Culleredo actúa para continuar as execucións que garantan as condicións da rede viaria municipal. Tanto é así que esta mañá executáronse os asfaltados en Vinseira Pequena, continuando esta tarde nas Barreiras, e mañá farase o propio en As Reixas e Seara.

Os traballos consisten na mellora do seu acabado estrutural e drenaxe, coa conseguinte optimización da seguridade. O firme será renovado, cun rebacheado nas zonas máis deterioradas, e a disposición dunha nova capa de rodadura en toda a superficie. Finalmente levarase a cabo a correspondente sinalización horizontal e vertical, así como o pintado.

No caso de Vinseira Pequena, o tramo de estrada que se renova é de 0,5 quilómetros, e conecta as vivendas coa AC-400. En As Reixas, a mellora levarase a cabo nos 842 metros totais da rúa. En As Barreiras actuarase nos primeiros 335 metros da vía, que é a que se atopa máis deteriorada.

O alcalde, José Ramón Rioboo, insiste na necesidade de “levar a cabo o noso plan de mellora do viario municipal para dotar a Culleredo de mellores conexións e sobre todo, incrementar a seguridade viaria en todas as zonas, xa sexan rurais ou urbanas”.