Os escolares de 5º de Educación Primaria de Culleredo traballarán por primeira vez a ecopercusión con talleres prácticos de dúas horas de duración. Nesta actividade, o alumnado aprenderá a facer unha ‘batukada’ a partir de materiais de refugallo. Un simple cubo de pintura usado e unhas baquetas bastan para que poñerlle ritmo a unha mañá de clase.

Deron comezo hoxe mesmo, no CEIP Sofía Casanova e CEIP Vila de Rutis, e sumaranse nos vindeiros días o CEIP Isaac Díaz Pardo, CEIP Plurilingüe Ría do Burgo, o CEIP Vila de Rutis, o CEIP Plurilingüe de Tarrío e o CPR A Ponte Pasaxe.

Precisamente esta mañá acudiron á inauguración do programa Cristina Pardo, concelleira de Educación, xunto a Jéssica Méndez, edila de Servizos Sociais. No Sofía Casanova, acompañaron ás e ós pequenos no comezo da actividade, que prestaron atención en todo momento ás explicacións do profesor.

Hai que dicir que os talleres están dirixidos por docentes de ‘Ecopercussión`, un colectivo especializado e organizado para servir como punto de apoio no ensino de todos os niveis, contribuíndo ao desenvolvemento da música instrumental, vogal e a expresión corporal.

Nese sentido, Cristina Pardo, concelleira de Educación, destacou que “se trata de combinar dúas actividades moi importantes: a música, elemento lúdico e educativo a partes iguais, coa posta en valor do importante que é que coidemos o medio ambiente, e o que se pode facer con cousas recicladas é realmente impresionante”, asegurou.