Hoxe, 1 de setembro de 2023, despídese unha nova edición do programa ‘Mañás de campamento’, impulsado polo Concello de Culleredo para favorecer a conciliación das familias do municipio.

Isto significa o comezo inminente dun novo curso académico, para o que as nenas e nenos de Culleredo xa están máis que preparadas. Así puido comprobalo a concelleira de Educación, Cristina Pardo, quen visitou ás pequenas e pequenos no CEIP Sofía Casanova para darlles as grazas polo seu bo comportamento e implicación durante as actividades, así como para desexarlles un bo inicio de curso.

Os campamentos estiveron destinados para nenas e nenos de idades comprendidas entre os 3 e 12 anos de idade, e matriculados no curso actual en Educación Infantil ou Primaria.

As actividades estiveron deseñadas para gozar dos xogos ao aire libre, sempre que a climatoloxía permitíseo, fomentar a convivencia e animar á interrelación entre as nenas e nenos. Estiveron adaptadas ás diferentes idades, cun enfoque activo e participativo. A ciencia, a historia, a música, as artes plásticas e a natureza foron temas que se abordaron nos diferentes talleres que levaron a cabo.