O Concello de Culleredo prepárase para a conmemoración do Día Internacional da Muller, o vindeiro venres 8 de marzo, con exposicións, obradoiros, encontros sociais, faladoiros en Radio Culleredo e unha andaina.

A primeira destas actividades será este xoves, 7 de marzo, coa inauguración da exposición de pintura da artista local Lucía Valeiras e co título “Pensar tamén era arte”. Será no Xardín Botánico, na aula de Natureza Juan Lembeye, ás 19:00 horas. Poderá visitarse os mércores, xoves e venres, de 18:00 a 21:00 horas, e os sábados de 11:00 a 13:00 horas e de 17:00 a 21:00 horas.

O propio 8M, que se conmemora o Día Internacional da Muller desde 1975, cando a Asemblea Xeral da Organización das Nacións Unidas declarouno así, Culleredo acollerá o encontro entre representantes das distintas asociacións locais que traballan con diversos colectivos, xunto a distintos membros do goberno municipal, e onde se debaterá sobre a realidade da muller actual nos distintos colectivos cunha perspectiva de xénero.

Participarán entidades como Alcer, Mestura, ANHIDA, Asociación Nacional de Presenza Xitana, TP Galicia, As Berenguelas e tamén traballadoras do CIM, o Centro de Información á Muller. Estará moderada por unha pedagoga e técnica municipal de servizos comunitarios. Dará comezo ás 12:00 horas, tamén na aula de Natureza Juan Lembeye do Xardín Botánico do Burgo. Será aberta ao público.

O mércores 20 de marzo levará a cabo un primeiro roteiro ‘consciente’ desde o parque biosaudable do Paseo Marítimo do Burgo ata o Xardín Botánico, con visita guiada á exposición de Lucía Valeiras. Durante a mesma, explorarase o noso patrimonio natural, arquitectónico e artístico.

Durante marzo e abril, Vilaboa e Fonteculler serán os escenarios elixidos para celebrar os talleres sobre identificación e xestión emocional, destinadas ás usuarias dos programas de dinamización do Concello de Culleredo.

Abril e maio son os meses escollidos para que a ONG Fundación Mujeres imparta os talleres dirixidos a mulleres coidadoras de persoas a cargo ou que precisen de autocuidado para unha mellora vital. No Pazo de Vila Melania de 10:00 a 12:00 horas en oito sesións.

Os meses de marzo e maio terán lugar talleres de dixitalización impartidos pola ONG Fundación Mujeres para adquirir competencias dixitais para a autonomía persoal. Serán na aula de informática do Centro Pintora María Cagiao de Vilaboa e no Centro Cívico Virginia Blanco de Fonteculler.

Por último, cada semana de marzo a partir do propio 8M, haberá faladoiros en Radio Culleredo con entrevistas a mulleres representantes de distintos sectores da nosa comunidade. Serán divulgadas nas redes sociais do Concello de Culleredo. Na 101.2 FM.