O Concello de Culleredo abrirá o vindeiro luns, 9 de setembro o prazo de preinscrición para as Escolas Municipais culturais e deportivas 2024/2025. Poderán formalizarse ata o 16 de setembro; a lista de persoas preinscritas publicarase o 19 e o sorteo público de prazas será o día 25 deste mes.

A preinscrición, e de ser o caso, a matrícula, poderá facerse de dúas maneiras. En primeiro lugar, por correo electrónico, descargando e cubrindo as fichas correspondentes e enviándoas ao correo escolasmunicipais@culleredo.es. Tamén, de forma presencial no Edificio de Servizos Múltiples en horario de 9:00 a 14:00 horas.

A matrícula poderá facerse efectiva do 30 de setembro ao 7 de outubro. As clases empezarán o 21 de outubro de 2024. O prezo xeral por actividade e trimestre será de 25 euros; e de 35 euros para persoas non empadroadas no municipio. Haberá bonificacións para casos concretos, que se poden consultar aquí.

O programa está deseñado tanto para persoas adultas como para nenas e nenos, nas modalidades cultural e deportiva. Así, as persoas interesadas poderán inscribirse en bailes de salón, swing, óleo, inglés, artesanía galega, patchwork, conéctache, Cullerchef, coro infantil, adestramento funcional, ritmo zum fitness, pilates, marcha nórdica, patinaxe, karate ou psicomotricidade.

Info completa aquí