O goberno local de Culleredo busca a participación activa dos maiores na vida do municipio. O Concello celebrou unha reunión cos delegados parroquiais, encontros que anuncia que intensificará para escoitar as súas propostas de primeira man e poder levalas a cabo. No encontro, os maiores xa trasladaron ideas coma a recuperación dos bailes os fins de semana e a impartición de clases de informática na aula de Vilaboa, cuestións que o Concello espera atender en breve prazo.

O XIII Campionato de Tute do Concello de Culleredo chega á sua gran final. Terá lugar o venres 14 de xuño a partires das 21.00 horas no Centro Social Torre de Celas. A final enfrontará á parella formada por Miguel e Baldo contra a formada por Evaristo e Antonio.

O goberno municipal de Culleredo, a Garda Civil e a Policía Local mantiveron un encontro para reforzar a colaboración en materia de seguridade. O Concello considera fundamental, tanto para a prevención, como para o esclarecemento dos delitos, a coordinación dos Corpos e Forzas de Seguridade. Para iso celebraranse reunións semanais entre os responsables da Garda Civil e da Policía Local.

O Concello de Culleredo reunirá este sábado, 8 de xuño, a 100 participantes no Torneo de Chave que alcanza a súa XXXII edición. Terá lugar no campo de Boedo a partir das 17.30 horas. A dirección técnica corre a cargo do Club de Chave Boedo e a “Irmandade de Chave”. Participan un total de 10 agrupacións.

O goberno de Culleredo, a través da colaboración coa asociación AEAL, inicia un programa complementario aos servizos que proporciona o sistema galego de saúde con obxecto de ofrecer o apoio psicolóxico que poden necesitar as persoas con cancro e  a súa contorna. O taller comezou esta semana e desenvólvese todos os martes e xoves, ás 8 da tarde, no Centro de Servizos Sociais de Vilaboa (xunto á parada de taxis).

Para animar ás familias a optar a algunha das vacantes, o Conservatorio Municipal de Música de Culleredo celebra hoxe, mércores 5, e mañá xoves 6 de xuño, as súas primeiras xornadas de portas abertas. Quen se achegue á dependencia municipal situada en Acea de Ama poderá acceder ás clases como observador e presenciar como se manexan os alumnos cos seus instrumentos. As portas abertas desenvolveranse entre as 17.00 e as 20.00 horas.

O luns, día 3 de xuño, ás 9.00 horas, abrirá a nova oficina de Correos do Burgo, situada nun local da antiga Casa dá Xuventude, cedido polo Concello de Culleredo á empresa postal. A apertura desta oficina foi longamente demandada pola asociación de veciños O Noso Burgo, pero Correos alegaba problemas económicos para facelo. O alcalde de Culleredo, Julio Sacristán, reuniuse hai dous meses cos novos responsables de Correos e chegou a un acordo para a cesión deste local municipal.

O Concello de Culleredo organizou un taller de cociña co fin de mellorar das habilidades sociais e de comunicación dos mozos participantes, que tomaron parte na iniciativa xunto coas súas familias. O Concello apostou pola cociña como entorno ideal para mellorar este ámbito, e que da posibilidade para a interactuación entre mozas e pais. A concelleira de Benestar Social, Guadalupe Pombo, foi a encargada de clausurar a actividade coa entrega de diplomas.

O Club Baloncesto Culleredo organiza, coa colaboración do Concello, o seu X Campus de Verán. Desenvolverase no polideportivo do Burgo de luns a venres, desde o 24 de xuño até o 5 de xullo, en horario de 9.30 a 18.30 horas. Está dirixido a mozos e mozas de 5 a 16 anos de idade. As inscricións poderanse realizar na polideportiva do Burgo (en horario de martes e xoves, de 18.00 a 20.00 horas) ou a través da páxina web do club (www.cbculleredo.es).