O Concello de Culleredo presenta a conta xeral do exercicio económico 2012 cuns excelentes resultados. De feito, a liquidación orzamentaria alcanza valores que non se lograban desde 2006. O remanente de tesouraría arroxa unha cifra que reverte radicalmente a situación negativa do pasado exercicio e agora alcanza os 2.907.995,97 euros.

Aena acaba de iniciar a segunda fase da construción da senda peonil que rodeará á nova cabeceira do aeroporto de Alvedro. Trátase dunha das actuacións solicitadas polo goberno de Culleredo para ofrecer aos veciños unha nova contorna de esparexemento e garantir a súa mobilidade na zona da ampliación da pista. Comunicará o novo parque da festa, inaugurado o ano pasado, con Fontemaior.

O festival BurgoJazz chega á súa XIII edición centrado na promoción dos artistas galegos e da comarca do xénero. Serán cinco xornadas, do 4 ao 8 de xullo, que levarán a grupos emerxentes ao xardín botánico do Burgo. Unha das grandes novidades reside na participación por primeira vez no festival da Big Band do Conservatorio. Desta forma, o Concello aposta por promocionar o traballo dun grupo creado no centro de formación municipal e con moito futuro no panorama musical.

O Concello de Culleredo desenvolverá no verán un programa nos parques biosaudables do municipio dirixido aos maiores. Os participantes poderán asistir a sesións de ximnasia ao aire libre nas instalacións que dispón o Concello en Celas de Peiro e en Vilaboa, no pazo de Vila Melania.

O Concello de Culleredo comeza a súa tempada de campamentos urbanos de verán, unha alternativa para a conciliación a través da educación que reunirá até setembro a 300 pequenos. O goberno de Culleredo estruturou os campamentos en diferentes quendas de datas e de diferente duración, habendo desde campamentos dunha semana ata de cinco.

O goberno de Culleredo combate o fracaso escolar cun programa público de apoio aos escolares durante o verán. Trátase dunha serie de talleres encamiñados a apoiar e colaborar cos alumnos cullerdenses que teñen materias pendentes para os exames de setembro ou ben que desexan mellorar as súas técnicas de estudo.Tamén ofertánse clases dirixidas a mozos para a obtención do título graduado en Educación Secundaria. O prazo de matrícula está aberto ata este venres 28 de xuño.

O Concello de Culleredo levará a cabo unha ampla campaña de roza polas estradas municipais de todas as parroquias. Abarcará a 164 quilómetros de 282 estradas municipais situadas en todas as parroquias. O goberno local tramita a contratación destes traballos para que poidan comezar de inmediato, cun investimento municipal que roldará os 40.000 euros.

O goberno de Culleredo demanda melloras na atención sanitaria do centro de saúde de Acea de Ama. O alcalde, Julio Sacristán, e a concelleira de Benestar Social, Guadalupe Pombo, desprazáronse ao Hospital Universitario da Coruña para manter unha reunión co director da Xerencia de Xestión Integrada da Coruña, Francisco José Vilanova, acerca do presente e futuro do servizo sanitario no municipio.

O servizo municipal de aluguer de bicicletas inicia tempada. As bicicletas atópanse xa aparcadas nos tres puntos habilitados: o paseo marítimo xunto á urbanización A Ría; o paseo do Burgo xunto á ponte sobre a ría; e o paseo do río Trabe en Vilaboa. Cada un dispón dunha pantalla intelixente para acceder ao aluguer mediante a traxeta do servizo. O servizo estará aberto ata o 15 de outubro e ofrece un horario continuado de 12 horas ao día: de 9.00 a 21.00 horas.