Culleredo loitará contra a reforma local que aprobou en decembro o Goberno do Estado. O pleno, a proposta do equipo de goberno, aprobou a interposición dun conflito ante o Tribunal Constitucional contra a Lei de Racionalización e Sustentabilidade da Administración Local.

 O Concello de Culleredo participa o mércores 26 de febreiro na xornada "Oportunidades dos productos locais para o emprendemento no sector agroalimentario", que celebra a reserva de biosfera das Mariñas Coruñesas e Terras do Mandeo, da que forma parte. A concelleira de Promoción Económica, Marta Iglesias, moderará unha das mesas de debate do evento.

O Concello de Culleredo organiza, xunto coa Asociación de usuarios de bancos, caixas e seguros (ADICAE), un taller para coñecer a factura eléctrica e aprender a reducila. Terá lugar o día 27 de febreiro no Pazo de Vila Melania ás 19.30 horas.

Culleredo e a rexión italiana de Reggio Calabria iniciaron o proxecto Schoolab. Está participado polo Concello, o IES Blanco Amor e a ONG Mestura por parte española, e pola Deputación de Reggio Calabria, o instituto Magistrale Gulli, e a asociación Pronexus, por parte italiana. A súa finalidade: desenvolver estratexias conxuntas para afrontar o absentismo escolar.

O seminario, titulado "Manexo dos trastornos de personalidade polos servizos profesionais de proximidade: estratexias e casos", organizado polo Concello de Culleredo e a Asociación Galega de Trastornos de Personalidade (TP Galicia) logra un gran éxito de público. Asistiron cerca de 40 persoas ás sesións celebradas en Vilaboa.

Os montes de Culleredo acollerán o domingo a VII Pedalada Ártabra coa participación de case 500 persoas. Cada un dos deportistas achegará un litro de leite ao Fondo Municipal de Alimentos, que despois serán distribuídos entre os cidadáns con necesidade.

O Concello de Culleredo ten previsto solicitar á Xunta de Galicia dous cursos preparatorios para as probas dos niveis de Celga 2 e Celga 4. En función dos interesados, a Xunta concederá a súa realización, polo que se abre unha preinscrición ata o 20 de febreiro.

O cotexo de documentación e a obtención de determinados certificados xa non levan o pago de ningunha taxa en Culleredo. Despois da súa aprobación en pleno, e tras finalizar o período de exposición pública sen recibir alegación algunha, entra en vigor a supresión dun total de 13 epígrafes da ordenanza fiscal número 6, a proposta do Concello de Culleredo

O Concello de Culleredo quere mostrar a súa "seria e profunda preocupación" pola falta de noticias da Xunta de Galicia achega do futuro instituto de Educación Secundaria para o municipio, unha petición reiterada polo goberno local e a comunidade educativa desde hai moitos anos.